Һәркемнең балачагы сөекле мәктәп еллары белән бәйледер. Анда үткән һәрбер матур мизгел күңелдә матур хатирәләр булып истә кала. Мәктәбебездә быелгы "Соңгы кыңгырау ” бәйрәме бигрәк тә истәлекле булды. Урта мәктәп булып оешканнан соң беренче чыгарылыш укучылары җыелды мәктәбебезгә. 40 ел вакыт үтеп тә киткән. Кемнәр генә юк араларында : гади эшче дә, врач, укытучы да, инженер, эшмәкәр дә. Бәйрәмдә мәктәпнең беренче директоры Георгий Яковлевич, укытучылар – Махфуза апа, Роза Асляховна, Светлана Зәкәриевна, Мәдәния Мансуровна, Әфүзә Мирзахметовна, Зәйнәп Зәкәриевналар катнашты. Алар үзләре укыткан укучылары белән очрашканда нинди хисләр кичергәннәрдер... Һәрберсенең йөзендә матур елмаю, күзләрендә сөенечле күз яшьләре иде. Һәрберсе үткәннәрне искә алды. Хәзерге яшь буынга матур, үткен фикерләрен җиткерергә ашыкты. Алар тарафыннан мәктәпкә һәм мәктәпне тәмамлаучы 6 укучыга истәлек бүләкләре тапшырылды. Яңадан очрашу мул табын артында дәвам итте. Иске мәктәп урынында куелган истәлек-һәйкәлне дә шушы класс укучылары төзегән иде. Бу көнне дә алар шунда килеп чәчәкләр салып, фотога төштеләр. Иске мәктәпне сагынып искә алдылар. Инде араларыбызда булмаган укытучы - ветереннарыбызның каберләренә зират кылдылар. Очрашуның матур бер мизгеле, күңелләрдә калсын уелып, Соңгы кабат булмас-язган булса, Күрешербез кабат җыелып! – дип, оештыручы классташларына, мәктәп коллективына зур рәхмәтләр әйтеп, матур фикерләр, күңелле хисләр белән таралышты алар. Әйе, шушы матур бер мизгел, без – яшь буынга олы тәрбия чарасы булды.